المساعد الشخصي الرقمي

مشاهدة النسخة كاملة : قصيدة طلكت الفرح ...للشاعر عبد الكريم محمد حسون الخشالي



مكرم
26-03-2012, 06:17 PM
:66 (46):

طلكت الفرح



طلكت الفرح بغيابك وفتحيت......بيبان الكلب للاه والونه

وعيوني بقت سهرانه طول الليل....صار الها السهر بعدك ترى سنه

على شفاهي بقيت انه اردد بيك.....يالاسمك نغم ما ينشبع منه

حرام عليك تتركني وانه متانبك ...يالبعدك جحيم وشوفتك جنه

موروحي بغيابك مرمراها الشوك ....جا بعدك تروح ألمن وتتعنه

يطك ورد المحنه من يمر طاريك ...ومهر شوكي يغير وما ألحكنه

يمسودن كليبي ومالي روحي أجروح ...جا يمته لغرامك كلبي ازفنه

صادكني السهر نتسامر انه اوياه ...تكلي اعيوني كافي واروح بس هدنه

احس كليبي يشرد بس ايريد ايجيك ...سلاسل صبري كلهن ما يلزمنه

جرح هجرك كبر والوحشه نلجم حيل...واشواكي ملح كل الساع ارشنه

دمع عيني يصب اعليك طول الليل .. تصبرني الوساده وتمسح الوجنه

كل صفنه تمر بي تهد الحيل ...ادور على السبب ذاك اللي زعلنه

رحت امشي بخيالي انبش اللي فات ...صدك ما لكيت الا الوفه عدنه

جا شنهي دكلي الزعلاك اوياي ...اذا كلبي السبب صدك اذبنه

انه بلياك مثل الكمرلو زاعلاه الليل...بعد يا هو اليشوفه وبيه يتغنه

اشوفنك ولك كل ساعة وي الروح ...اسولفلك وكلك فدوه ددنه

ما بطل ولو لامتني كل الناس....ولو كالو على مخبول بي جنه

جا هو اليحبه صاحي يبقى اشلون ... اذا ريم البراري يغار من حسنه

بحر انت وسفينه انه بلي اشراع ....كل ساع تغيض وموجك يذبنه

جا يمته تعيد احسابك انت اوياي ...صدك ما خسر كلمن يواددنه

تعال وشوفني شكد انه افرح بيك ....مثل فرحه عروس بليله الحنه

انثرنه ورد درب التجيني بيه ...وكل لعاذلي بعد اكطع الظنه

بحرين
27-03-2012, 07:01 AM
شاعرنا المبدع دائما عبدالكريم الخشالي
لا أقوى على مجاراتك ولا مجاراة أي قلم عراقي بكل تأكيد
وكل ما أرجوه هو أن تتقبل مني هذه المشاكسة البسيطة باعتباري ضيفا عليكم قادما من البحرين واقول:



رافگت الفرح بغيابك وغنيت ...... وفارگت الحزن والآه والونه
لا عيني سهرت لا گلبي ون بليل ...... لأن گربك عذاب وبعدك الجنة
گبل طبع الشفايف تفرح بطاريك ...... وهسه اسمك شفافي ترتجف منه
خسارة سنين عمري الضيعتها وياك ...... احذرك يمي بعد اليوم تتدنا
مو روحي بوجودك مرمراها الضيم ...... واهم من تظن الشوفك اتعنه
يذبل كل ورد من يسمع بطاريك ...... ويتمنى لجدام بساع يدوسنه

ابو ابراهيم الخزرجي
28-03-2012, 07:42 PM
حس كليبي يشرد بس ايريد ايجيك ...سلاسل صبري كلهن ما يلزمنه

تحياتي وتقديري لك ياشاعرنا بهذا الهطول الجميل
تحياتي وتقديري وخالص الود والورد

بسمه الصباح
28-03-2012, 08:54 PM
قصيده روووووووعه
يسلمووووووووووا