المساعد الشخصي الرقمي

مشاهدة النسخة كاملة : ألرجوع ألى الماضي



احسان القريشي
28-03-2012, 01:18 PM
أيام الطفوله اذكرهه حلوات
واذكر بيتنه وتنورنه الطين
تخبز أمي چانت والعصافير
بصينت اللواث ينگرن طحين
تحط امي الگدر عالچوله وتروح
تخيط عالمكينه جروح السنين
من گد ما شريفه وساتره الحال
بشيلتهه يحلفون الجوارين

ليش اختلفت هسه الصورة
وقله الحافظ على تنورة
والنسوان اكثرهن صارن
تمشي بشارع ما مستورة

أيام الطفوله اذكرهه حلوات
ومن اذكرهن دمعتي تحني الخدود
بنات الجار چنه وياهن اخوان
بخوتنه دغش ما چان موجود
وياهن نطب وسط البساتين
نكمش كل فراشه تحط عالورود
چان بينه الشيطان مذبوح
بيض گلوبنه وما بيهن السود

وهسه اختلفت كل دنيانه
والشيطان يعيش ويانه
واكثرنه الينظر يا وسفه
بنظرت سوء البت جيرانه

أيام الطفوله اذكرهه حلوات
واحس روحي عليهن شمعة وتذوب
من گد ما أمان بذيچ الايام
نغفه اعله السطح ومفتحه البوب
ثلج ما چان عدنه بمرت الصيف
لچن بارد نحس بماي الحبوب
گبل ما ننحسد لن امي كل يوم
طگطگ حرملات بوكت الغروب

چان الفرح يدگ ابابي
ومحد ميت من احبابي
أتمنه الأيام الراحت
ترجع والعب ويه اصحابي

خادم الحسين (ع) أن شاء الله
الشاعر
احسان القريشي

مكرم
29-03-2012, 08:11 AM
عشت يا اخي احسان القرشي على هذه القصيدة المحمله بعبق الماضي ...الماضي الذي كان شعاره الصدق والبراءه والطفولة الجميلة رغم بساطتها وذكرتنا بامهاتنا الصابرات المجاهدات اللواتي كن مثالا للعفة والتضحيه تقبل تحياتي . الشاعر عبد الكريم محمد الخشالي /ميسان

سلام الدراجي
01-04-2012, 04:56 PM
گبل ما ننحسد لن امي كل يوم
طگطگ حرملات بوكت الغروب

رااائعه القصيده بكل معنى الكلمه
تحياتي الك احسان القريشي

بسمه الصباح
01-04-2012, 06:22 PM
ياوسفه ظاعت ذيج الايام
وصارت ذكرى نشوفه احلام
تقبل ردي عله قصيدتك الرائعه

محسن المفرجي
01-04-2012, 06:34 PM
كلمات القصيدة جميلة جدا سلمت الانامل التي خطتها
تقبل تحياتي