المساعد الشخصي الرقمي

مشاهدة النسخة كاملة : قصيدة شكد صبر انه اشتريت للشاعر عبد الكريم محمد الخشالي



مكرم
03-04-2012, 07:30 AM
شكد صبر انه اشتريت

شكد صبر انه اشتريت.....وما بعت شوكي وبقيت انه انتظر

وانت حبي وما ابيعك مستحيل .....يلي حبك ابقى بيه انه افتخر

يلي حبك دوه وصفاه الطبيب.....ولولا حبك هسه تلكاني احتضر

ولو ردت روحي ثمن بيها اشتريك....عمري ابيعه واشتريك باي سعر

انه مثل الكاع لو مر بيها الخريف....وانت مثل الدهله لو بيها تمر

يل كربك لبس ايام العمر فرحة العيد ....ونار بعدك بالكلب بس تستعر

يا ربيع ايامي بيك انه سعيد ....ومن تغيب ابقه حزين ومنكسر

انت مثل الشمس بايام الخريف ...من تغيب البرد يعصرني عصر

شرد اوصفك وهذا مني مستحيل.....واللي اوصفك بيه من حسنك ترى بايك كتر

انت ما مخلوق من ماي وتراب ....انت ياقوت ومطرز بالدرر

تدري من تضحك وترسم عل الشفاه ....بسمه تسحرني سحر

يل غرامك سلب من عيني النوم ....ولبساهن بالغصب ثوب السهر

انه متعني ترى لكلبك اطوف....ولو منعت الحج خليني اعتمر

انه ما حبيت مثلك مستحيل......يل غرامك سلب من عندي الفكر

يل غرامك احلى من ماي الزلال ....وانه من دونك احس بطعمه مر

انه اسال وانتظر منك جواب ....ليش كلبك من غرامي يعتذر

مو تفحم كلبي من نار الغرام ...وانت كلبك جنه ما همه الامر

انه راح اصرخ واصيح باعلى صوت ...انت جتالي ومنك ما افر

يا حلم عاش بخيالي من زمان ...ما يفاركني ابد طول العمر