المساعد الشخصي الرقمي

مشاهدة النسخة كاملة : يا حسين ابلايه صوت



سيد شبر الحسيني
27-06-2012, 11:54 AM
يا حسين ابلايه صوت .....جيت اصوّت و التصوّت بلسكوت
جيت و الچلمه اسيره
اسّراها ابسيفه چف الخجل من رادت تفوت
و الضمير ايصّلي ابمحراب عثرات الزمان
ارد اعاين للشموخ
وارد اشوف عيون صبح الكبرياء
انته شلّك بلكلام
انته تنطي الدنيه لون
لون مو مثل الصور لتبسّط ابسوگ الجمال
لون قمصان الورود......من يغازلهه النده ابوكت الصباح
لون قوس القزح يخجل منه و امحدّب يجيك
وياخذ اعطور الهوا و يمسحهن ابوجه الحيات
يا حسين انته الآمان
وعلمتنه اشلون نوگف من يمر ابساحل الايام حوت
و نعلن الحرّيه شربت كاس من ايدك و لا رايح تموت
يا حسين ....صوتك احمر صوت و ايگطّر رسايل بيهه ثوره و عنفوان
و غنّه للحريه چلمات السيوف ... ابلحن من لحن السنان
و دگ دگ ابساميرتابوت اللي ما يحترم اصوات الحمام
آنه اصوّت بلسكوت و السكوت ابلغ كلام
يا حسين ... يا عصارة لأنبياء
انته مو للمسلمين ... ابريحتك يتنشّگ العالم جميع
انته لليشتري العزّه وما يدنّگ للرياح
اليقبل الذلّه حقير
اتشطبه من نص دفترك كل واحد الرايد يبيع
انته شاعركل زمان ... و ابمسير التمشي بيه اتفض شعور
و من حلاتك تشرگ ابچلماتك احلوگ السطور
و حافر احصانك كتاب و بيه رساله من الحقوق
و انته ما رايد مديح
و ابمسيرك ما تفكر تستريح
ارفضت ما رايد تعيش اعله التراب
و گمت حطّيت الرحال ابگاع مالكهه الرحيل
تعطش و تروي الخلود
ابكاس بارد ...من احبوب المستحيل
ما نلم مدحك عله روس الرجال..... و ما يعبر اسفينتك بحر المديح
مدحك اتلمّه الشمس من الضماير....حته يصبح بيك كل جيل احتفال
يمن ظيّفت الآباء
شامخ ابطول الدهر بلكون ناصبلك مظيف
و من يجي المعتاز تنطيه درس ما تنطيه رغيف
تحياتي