المساعد الشخصي الرقمي

مشاهدة النسخة كاملة : قصيده بعنوان تمنيت العمر اكضيه للشاعر عبد الكريم محمد الحسون



مكرم
29-07-2012, 06:33 PM
الى بلدتي الحبيبه الميمونه

تمنيت العمر اكضيه وياج
يا ديرة هلي يا منبع الطيب
يل اسمج كتبته بدمع عل البال
ومن يوم التركتج زارني الشيب
يا حلوه وجميله وبيج ارتاح
واجروحي من ازورج كلهن اطيب
صدكيني من اشوفج انسه دنياي
مثل ملكه حبيب مفارك احبيب
يا ام الوفه والكرم والجود
ابد مو الج ذاك ال يدخل الجيب
حسافه الدهر خلى اهلج بعيدين
وفطمنه الوكت عنج بس ترى يخيب
لان احنه ابد ما نكدر نعيش
وهم شفت النمل عل الماي اله ادبيب
على اترابج نحس براحة البال
وتموت اهمومنه واحزانه اتسيب
ميمونه الدهر فركه الاحباب
بس حبج ابد عن كلبي ميغيب
يا دار الطفوله ودار الاحباب
يل اهلج كرمهم دجن الذيب
ميمونه شكولن وانت عنوان
ورحم غير الشهامه ابد ميجيب
عل شفافي عسل اسمج احس بيه
وحسن فركتج للروح تعذيب
ميمونه العمر هم يرجع ارجوع
لايام الزغر نلعب ملاعيب
ايام انغط ونفوج بالشط
وعلى الشاطي نسوي احنه الاعاجيب
نبني من الرمل والطين ال اقصور
وبعد ساعه نخرب كل شي تخريب
ونعجن بالزهر ونذبه بالماي
بلجي السمجه تاكل منه وتعيب
شذكر ولج والحسره بالروح
ودمع عيني يسيل وجنه مرزيب
تظل ذكراج تنبت دوم بالروح
تخظر والزمن الها حواطيب
ميمونه وحك الملح والزاد
اظل بيج انه هايم ابد ما توب
29/7/2012