المساعد الشخصي الرقمي

مشاهدة النسخة كاملة : عابر الخوف (بقلمي ) للتثبيت



علي الغنيمه
17-05-2009, 01:12 PM
بين يقضه !! وبين ومضات الخيال
اتجولت بين المعالم
بيدي كراس وقلم
شغل ماعندي اووظيفه ***
جيت لابواب الزمن محتار ادور ؟؟
عالحقيقه ,,وعالضمير ,, وجلمة الحق الشريفه **
وتيهتني البوب
من واحد للاخر
وأدوت باذني السراكي
من سراكينه المخيفه ***
تجولت عابر زماني
وجنطة اجتافي ثكيله
فتت باب وشفت حارس صاح بيه وشهر سيفه ***
خفت من هيئة الحارس
وهوه خازرني ويناشد
كللي انته منين يالعابر زمانك ؟؟؟
شجابك البوب الزمن ؟؟؟؟؟؟
عابر الخوف ورصيفه ****
شنهو اسمك ؟؟؟ وياأسم يحمل زمانك ؟؟؟
اصحه من حلمك وارجع
لاتوسخ عتبة الباب النظيفه ***
وكع من ايدي القلم
واختنك صوتي ابعبرتي
كتله
كتله آنه ؟؟؟ آنه شاخه اتفيض بالذل والمهانه !!
كتله آنه اسمي قضيه امعلكه ابوب الزمن
والحزن خيمه اعله طيفه***
كتله آنه من الزمان الماله اسم
وعابر الخوف ارد ادور شي شبيه
وماحوه التاريخ شي شابه زماني
شي شبه دمعة يتيم وفاض حيفه ***
كالي الحارس اتريض
لاتخلي الظن يخونك
راح افكلك باب واعبر
بس شرط يفتح جنطتي ويفتشني اعله كيفه ***
من فتح جنطة اجتافي اشتمر عنهه
وعينه نطت للسمه
نفض ايده انفس جالخوره وحيفه ***
كمت اتدارك الموقف واشرح اشبيهه جنطتي ؟؟
أولا !!!
دم طفل مذبوح يصرخ شنهو ذنبه ؟؟
وحلك عطشان ويريد الدم يشربه !!!
وخشبه من باب الصريفه !! ***
وثانيا !!!
ثوب حره امشكك وفوطه قديمه
ملطخه ابدم البكاره !!!
وعين تبجي الحره من صارت وصيفه !! ***
وثالثا !!!
أيد مشبوكه ابسلاسل تدعي لله
وراس خالي من العيون
شلع اعيونه الرصاص
وحبل ملفوف اعله ركبه
مثل لفات السفيفه ***
ورابعا !!!
كلب أم مفرفح وجرحه ايتناتك
وجبده تنزف من جسم والد حزين
وكسره من عكاز شايب
ودع اعيونه اووليفه ***
***
شمر سيفه الحارس ودمعت عينه
كلي انته منين يالعابر زمانك ؟؟
منين اجيت وهيجت بركان نايم
نزع درعه وكال هيجت الجروح
هذا سيفي وهذا درعي
لجلك ارد امشي واعيفه ***
آنه مثلك كبل جيت انشد وادور
بلهفة المحتار ؟؟وابواب الزمن !!!
باب امر من باب يخسر من يضيفه ***
يلله حط ايدك بايدي واشمر الجنطه الثكيله
ذب القلم والكراس مثل ماذبيت درعي
وخل نهاجر نمشي بجدام الخفيفه ***
نرحل لابعد جزيره
بلازمان ودون ناس
نهجر التاريخ خل يبقه اعله زيفه ***
وتالي !!!!
حل بينه المطاف آنه والحارس مشينه
وبالدرب نمشي وندندن !!!!!!

الصابني بهالوكت ماظن ورد مثله
وآنه الجنت بالوفه الحجي الصدك مثله
عربيد اجه الصفنتي ابهيئة اخو مثله
ياصاح جرح الوكت منه الكلب مابره
لاخيط فاد الجرح والطب عجز مابره
بجم آه متهوم الكلب منهن ابد مابره
واروح سمجه ابحر وشباج ضيمي ماثله
**********************************
**********************************
مع اعتذاري لطول القصيده
علي الغنيمه

سلام الدراجي
17-05-2009, 05:02 PM
الله ابوحسين السلام عليكم قصيده تفعيله رائعه بارك الله بيك اخي العزيز تحيه اليك دمت بخير

علي الغنيمه
17-05-2009, 10:10 PM
الله ابوحسين السلام عليكم قصيده تفعيله رائعه بارك الله بيك اخي العزيز تحيه اليك دمت بخير
يارب يسلمك تاج راسي الدراجي اشكرمرورك وردك الشافي ممنوون منك ولك السلام

أسامه الشاعر
18-05-2009, 12:31 AM
حلو وعاشت ايدك علي وسلمت للقصيده الرائعه
تحياتي

محمد السوداني
18-05-2009, 02:48 AM
قصيدة رائعه صح السانك وعاشت الايادي اخويه العزيز بوركت

تقبل تحياتي وتقديري